Hurkač razljutio Đokovića pa spakovao kofere

Najbolji teniser planete Novak Đoković uspješno je preskočio i treću prepreku na Vimbldonu. Srbin je bio bolji od Huberta Hurkača, slavivši sa 7:5, 6:7 (5), 6:1, 6:4.


Poljak se pokazao kao tvrd orah, pogotovo u prva dva seta. Drugu dionicu uspio je da riješi u svoju korist, čime je, čini se, samo razljutio favorita.

Jer, Nole je do kraja meča potpuno gospodario terenom broj jedan i rutinski stigao do novog slavlja.

Ože-Alijasim ili Umber?

Sljedeći protivnik će mu biti bolji iz okršaja između Feliksa Ože-Alijasima i Uga Umbera.

Početak srpsko-poljskog boja bio je “tvrd”. U prva četiri gema teniseri su lagano čuvali svoj servis, da bi Đoković zaprijetio u petoj igri. Stvorio je tri brejk-lopte i sve tri je propustio da realizuje.

Sličnu situaciju smo gledali u 11. gemu. Prvi reket planete je poveo 40:0, međutim, odlični Hurkač se opet vratio sa ivice ambise. Ali, samo nakratko, pošto je favorit iskoristio sedmu brejk-loptu, a potom odservirao za 7:5 i osvajanje prvog seta nakon 53 minuta igre.

I u drugoj dionici smo gledali sjajnu, rovovsku borba dva inspirisana takmičara. Dobrim servisima i jedan i drugi su čuvali prednost početnog udarca, tako da je sve “mirisalo” na taj-brejk.

Doduše, Nole je imao priliku da sve riješi prije 13. igre. Pri rezultatu 3:3 imao je tri brejk-lopte, a Hubert se, po već oprobanom receptu, izvukao iz neugodne situacije. Poljak je zaprijetio u 12. gemu. Imao je dvije set-lopte, ali se ovog puta Srbin spasio.

Dobra igra dala je krila Hurkaču u taj-brejku i sa nekoliko sjajnih poena došao je u priliku da izjednači rezultat. Nije ju propustio, pa je nakon 118 minuta igre na semaforu pisalo 1-1.

Gubitak druge dionice kao da je razljutio favorita. Srbin je u trećem setu značajno podigao nivo igre i u takvom odnosu snaga Hubert nije imao šta da traži. Sjajnim riternima Đoković je “otupio” jako Hurkačevo oružje, servis, tako da je relativno lako stigao do novog vođstva. Ostvario je dva brejka i za svega 25 minuta dobio set rezultatom 6:1.

Nole po 12. put u osmini finala

Dobar ritam iz treće, Nole je prenio u četvrtu dionicu meča. Pun samopouzdanja, Srbin je “brejknuo” Poljaka već u trećem gemu i tako nagovijestio epilog.

Favorit je do kraja susreta rutinskom igrom čuvao svoj servis, upisao novu pobjedu, te po 12. put vizirao osminu finala na londonskoj travi.

Srpska Cafe